Хүн төрөлхтөн мөнгөө зөвхөн хадгаламжид хийж өсгөхөөс гадна өөрөөр өсгөх боломж хайж эхэлснээс хойш хөрөнгө оруулалтын олон хэлбэр бий болсон. Тухайлбал, хувьцаа, бонд, хөрөнгөөр баталгаажсан үнэт цаас, криптовалют, үл хөдлөх хөрөнгө, үнэт эдлэл, хувийн бизнес гэх мэт.
Гэхдээ яг яаж та бидний хөрөнгө өсдөг вэ гэж үү?
Жишээ нь, та мөнгөөрөө цаашид үнэ цэн нь өсөх боломжтой гэж үзсэн нэг зүйлээ худалдаж авлаа гэж бодьё. Харин ирээдүйд өнөөх зүйл тань эдийн засгийн эргэлтэнд орж үнэ цэн нь өсөхөд таны хөрөнгө оруулалт ашигтай байж, хөрөнгө тань өснө. Үүнийг л хөрөнгө оруулалт гээд байгаа юм.

Хөрөнгө оруулагч болоход ямар нэгэн шаардлага байхгүй, та өөрийн хүссэн хөрөнгө оруулалтын бүтээгдэхүүндээ шууд хөрөнгө оруулах боломжтой. Гэхдээ та хөрөнгө оруулахын тулд эхлээд хувьцаа авах бол брокерийн компанид, криптовалют авах бол цахим биржид бүртгүүлэх шаардлагатай. Бид алим худалдаж авахдаа дэлгүүрийн лангуун дээрээс, худалдагчаас авдагтай адилхан бүх хөрөнгө оруулалтын бүтээгдэхүүнүүд ямар нэг газраар дамждаг гэдгийг санаарай.

Хадгаламж нь эрсдэл багатай ч түүнийгээ дагаад харьцангуй өгөөж багатай бүтээгдэхүүн юм. Тухайлбал, та жилийн эцэст хуримтлуулсан мөнгөн дээрээсээ нэмээд хүүгийн орлого авдаг. Харин хөрөнгө оруулалт нь ногдол ашиг авахаас гадна үнэ цэнэ нь үргэлж л өсөж байдаг. Хэрэв та үнэ цэн нь өсөх зөв хөрөнгө оруулалт хийж чадсан бол жилийн эцэст тухайн хөрөнгө оруулалтаасаа хадгаламжаасаа ч их ашиг хүртэх боломжтой. Харин яг зөв цагт нь хөрөнгө оруулах нь чухал юм.

Та ₮10,000 төгрөгтэй байсан ч хөрөнгө оруулж болно. Гэхдээ тухайн хөрөнгө оруулж буй бүтээгдэхүүнээсээ шалтгаална гэдгийг мартаж болохгүй шүү. Жишээ нь, та хувьцаа авах гэж байгаа бол тухайн хувьцааны ханш хэдтэй байна гэдгээс шалтгаална гэсэн үг.

Хэрэв танд хөрөнгө оруулалтын туршлага байхгүй, хэрхэн хөрөнгө оруулахаа мэдэхгүй эсвэл хөрөнгө оруулалтын судалгаа шинжилгээ тогтмол хийх боломж байхгүй бол Хөрөнгө оруулалтын санд /ХОС/ хөрөнгө оруулах нь хамгийн тохиромжтой.

Хөрөнгө оруулалтын сан /ХОС/ гэдэг нь олон нийтээс хөрөнгө татан төвлөрүүлж, урьдчилан судлаж, төлөвлөсөн хөрөнгө оруулалтын бодлогын дагуу мэргэжлийн хөрөнгө оруулалтын судалгаа, шинжилгээ хийсний үндсэн дээр хувьцаа, бонд, хөрөнгөөр баталгаажсан үнэт цаас зэрэг үр ашигтай гэж үзсэн санхүүгийн хэрэгслүүдэд хөрөнгө оруулж, өгөөж бий болгох зорилгоор нэгдсэн хөрөнгө оруулагчдын нэгдэл юм.