Зах зээлийн 7 хоногийн тойм 11/13-11/19

ДОТООДЫН МЭДЭЭ

2024 оны 1 сарын 1-нээс эхлэн хөдөлмөрийн хөлсний доод хэмжээ цагт 3,929 төгрөг буюу сард 660,000 төгрөг байхаар шинэчлэгдлээ.

2024 оны Төсвийн тухай хуулийн төслийг УИХ эцэслэн баталлаа. Үүнд Улсын нэгдсэн төсвийн тэнцвэржүүлсэн орлого 25.8 их наяд төгрөг, нийт зарлага 27.3 их наяд төгрөг (2023 оны төсвөөс 22%-иар өндөр) гэж хуульчилснаар төсвийн тэнцэл 1.5 их наяд төгрөгийн алдагдалтай байхаар тооцоолоод байна.

Үндэсний статистикийн хороо 2023 оны эхний арван сарын гадаад худалдааны мэдээллийг танилцууллаа. Монгол Улс энэ он гарснаас хойш нийт 161 улстай 20 тэрбум ам.долларын гадаад худалдаа хийжээ.

__________________________________________

ДЭЛХИЙН МЭДЭЭ

АНУ-ын инфляцын түвшин буурч байна. 10 сард эрчим хүчний үнэ 2.5%-иар буурсантай холбоотойгоор 9-р сард 3.7% байсан инфляц 3.2% болж буурсан болохыг Хөдөлмөр, статистикийн хороо мэдээллээ.

Харин бодлогын хүүгийн хувьд Холбооны Нөөцийн Сан 2024 оны IV улирлаас эхлэн хурал болгоноороо бодлогын хүүг 0.25 суурь нэгжээр бууруулна гэж Morgan Stanley-ийн шинжээчид таамаглаж байна.

Дэлхийн хамгийн том эдийн засгийн ерөнхийлөгч нарын уулзалт өнгөрсөн 7 хоногт Сан-Франциско хотод болж өнгөрлөө. Энэхүү уулзалт нь хоёр улсын дипломат харилцааг сэргээх зорилготой байсан бөгөөд талууд уулзалтыг Бодит ахиц дэвшил гарсан гэж дүгнэжээ.

Huawei болон China Mobile компаниуд хамтран Бээжинг Хятадын өмнөд нутагтай холбосон 3,000 км урттай, секундэд 1.2 терабитийн хурдтай интернэт сүлжээг бий болголоо.

АНУ-ын Конгрессоос гаргасан Цаг уурын тайланд уур амьсгалын өөрчлөлтөөс болж АНУ-д жил бүр 150 тэрбум долларын өртөг үүсдэг болохыг дурджээ.

ХӨРӨНГИЙН ЗАХ ЗЭЭЛ

Монголын хөрөнгийн зах зээл

Монголын хөрөнгийн бирж дээр өнгөрсөн 7 хоногт 5 удаагийн үнэт цаасны арилжаа, 6 удаагийн нүүрсний, 8 удаагийн төмрийн баяжмалын цахим арилжаа зохион байгуулагдаж, нийт ₮134 тэрбумын арилжаа хийгджээ.

11 сарын 17-ны өдрийн байдлаар хөрөнгийн зах зээлийн үнэлгээ ₮10.2 их наядын үнэлгээтэй байна. Арилжааны идэвхийн хувьд тоо ширхгээр Эрдэнэс сольюшинс ХК (АМТ)-ийн 1,245,158ш хувьцаа, үнийн дүнгээр Хаан банк ХК (APU)-ийн хувьцаа ₮1 тэрбум төгрөгөөр хамгийн идэвхтэй арилжаалагдсан байна.

TOP 20 индекс өмнөх долоо хоногтой харьцуулахад +0.06%-иар, MSE В индексийн хувьд +1.01%-иар тус тус өсөлттэй хаагдсан бол MSE А индексийн хувьд -0.06%-иар уналттай хаагдсан байна.

TOP-3 өсөлт: ТАВИЛГА (TVL) +51.9%, УВС ЧАЦАРГАНА (CHR) +15.0%, УЛСЫН ИХ ДЭЛГҮҮР (UID) +13.4%.

TOP-3 уналт: ЭРЧИМ БАЯН ӨЛГИЙ (BOE) -14.9%, CЭНТРАЛ ЭКСПРЕСС СИ ВИ ЭС (CUMN) -12.7%, МОНГОЛЫН ЦАХИЛГААН ХОЛБОО (MCH) -11.7%.

QPay үйлчилгээг банк, санхүү, худалдаа, үйлчилгээний салбарт нэвтрүүлэгч “Инновэйшн Инвестмент” ХХК IPO хийнэ.

“ОМНИ АССЕТ” ХБҮЦ-ны анхдагч зах зээлийн арилжаа 11 дүгээр сарын 22-ны өдрөөс эхэлнэ.

Санхүүгийн зохицуулах хороо нэр бүхий 9 хөрөнгө оруулалтын менежментийн компанийн тусгай зөвшөөрлийг түдгэлзүүллээ.

Говь ХК нь Азийн Хөгжлийн банкнаас 30 сая ам.долларын урт хугацаат эргэлтийн хөрөнгийн санхүүжилт авахаар болжээ.

__________________________________________

Америкийн хөрөнгийн зах зээл

Өнгөрсөн 7 хоногт S&P 500 индекс $4,500 давлаа. Үүнд инфляц буурч эхэлсэн, жижиглэн худалдааны салбарын гүйцэтгэл (Target Corporation (TGT)-ийн сайн тайлан) зэрэг мэдээллүүд голчлон нөлөөлсөн байна. Ийнхүү, S&P 500 индекс +0.95%, Nasdaq Composite индекс нь +0.75%-иар, Dow Jones Industrial Average индекс +0.75%-иар тус тус өслөө.

Европын хөрөнгийн зах зээл

Европын хөрөнгийн зах зээлд мөн өсөлт ажиглагдаж, Европын STOXX Europe 600 индекс 2.82%-ийн өсөлттэй хаагдлаа. Энэ нь инфляцын дарамт багасаж, төв банкнуудын зээлийн хүүг бууруулах хүлээлт нэмэгдсэнтэй холбоотой юм. Ийнхүү, Stoxx Europe 600 индекс +0.72%, Их Британийн FTSE 100 индекс +0.56%, Германы DAX индекс +1.83%, Францын CAC 40 индекс +0.61%-иар тус тус өсчээ.

Азийн хөрөнгийн зах зээл

Өнгөрсөн 7 хоногт Японы Nikkei 225 индекс 0.08%-иар өссөн байна. ДНБ-ны III улирлын мэдээ таамаглаж байснаас сул гарсан ч компаниудын орлогын сайн тайлангууд зах зээл өсөхөд нөлөөлжээ.

Хятадын хөрөнгийн зах зээлийн хувьд Shanghai Composite индекс 0.28%-иар унав. 10-р сарын үйлдвэрлэл, жижиглэнгийн борлуулалтын хэмжээ таамаглалаас давсан боловч дэд бүтэц, үл хөдлөх хөрөнгийн салбарын хөрөнгө оруулалт буурсан нь эдийн засгийн тодорхойгүй байдлыг нэмэгдүүлэв.